ZZBattorinas del CampidanoAprile
/ 0
Dettagli
- Dettagli
- Pubblicato Venerdì, 12 Agosto 2016 14:28
- Scritto da Giuseppe
- Visite: 2335
AAD Battorinas de Beranu Aprile
Trallaleru/a Torràda...
Cantu de Amori > Sa Pregunta > Su Coru > Su Piccioccu > Sa picciocca
Su Coru
Imoi nosu cantaus
a luxi de lugòri
de dus innamoraus
su Cantu de Amori
Torràda
Issu
De candu fia pippiu
e ia biu a Rosa
m' hiat nau su coru miu
de midha fai isposa
Torràda...
Issa
Pena ki biu dh' ia
in dh' una cambaràda
maccai essa pippia
mi fia innamoràda
Torràda...
Su Coru
Bessit u' steddu in célu
nascit in campu u' fròri
crescit abelu abelu
me is dus pippius s'amori.
Torràda...
Issu
Custa bella pippìa
m'hat postu sentimentu
de candu dh' happu bia
su coru est in trumentu.
Torràda...
Issa
Parrit un anjuleddu
calau de paradisu
custu bellu pippieddu
onnya notti dhu bisu.
Torràda...
Su Coru
Passant insà is annus
po is dus innamoraus
maccai siant mannus
no si funti fueddaus.
Torràda...
Issu
Deppu pigai allientu
po dha podi fueddai
imoi est su momentu
de midha pregontai.
Torràda
Issa
It'hadessi abettendi
est propiu abbrebebàu
jei si podit cumprendi
ca est tottu innamorau.
Torràda...
Su Coru
S'abettu lassa stai
Peppinu poni allientu
dha deppis pregontai
est imoi su momentu.
Torràda...
Issu
"Arrosa mia bella,
luxi 'e su coru miu
prus bella ke una stella
cun is ogus mius ti biu"!
Torràda...
Issa
"Peppinu miu bellu
bellu ke unu fròri
prus 'e isteddu in celu
tui portas luxentòri"!
Torràda...
Issu
Arrosa mia 'e su coru
amori miu Arrosa
prenda mia e tesoru,
ti fais cun mimi sposa"?
Torràda...
Issa
"Peppinu miu stimau
lillu bellu frorìu
su trumentu nd'das liau
ay custu coru miu"!
Torràda...(fine)
SA Dì de Pasca Manna
Sa banda musicali
e puru sonus 'e canna
a s'Incontru Triunfali
sa dì de Pasca Manna!
Torràda...
-----------------------------------
Sa Predica de Pasca Manna de s'arrettori "C" in sa cresia de Santa Barbara de Gonnosfanadiga
Quartinas "undighinas" (a rima alternata)
- De cantu babbu e mamma mi contànta
dess' arrettori m'abarrat in sa menti
sa predica 'essa dì de Pasca Santa:
prena prena fiat sa cresia 'e genti.
- Momentu 'e tanti tempus abettau
po podi nai su ki in coru portàda,
in su sonnu dh'iat fintzas bisau,
s'hora giusta fiat propiu arribàda.
- E de sa trona aici iat cumentzau:
"Custa est sa domu dessu Babbu Nostu
e Issu no est pro nudda prexàu
iscarescius si ndi seis de custu postu,
- Ma candu arrìbat sa serràd''e is contus
sa cosa no si parrit meda bella
cumentzais is pregus e is prantus
y a tremi insà si pigat ke sa folla;
- Imoi si nau su ki m'est capitau,
sa gratzia su Sennori m'hat cuntzediu
de bisitai sa domu de su tiau.
deu bolu nai pro ki no m'hat cumprendiu,
- Ca happu potziu biri cussu logu
aundi funti is animas dannàdas
de is peccadoris, mallendi fogu
e sen''e pasiu funti trumentàdas.
- Est unu logu de pistu e trumentu
dho-y hat genti prangendi in tribulìa
disijosa de agatai u'pagu 'e assentu
currendi finas a s'urtima salìa:
- U' bentu callenti dho-y sulat mui, mui
y espis e bubbusus bola, bola
pungint cussa genti fui, fui
prena, prena 'e sanguni cola, cola.
- Tzerrius, prantu e fastimus màus
cussu logu de dolori intronant,
in s'airi murra bola, bola is tiàus
cussas animas dannadas affruccònant.
- In mesu 'e cussu tallu in assubentu,
sen''e sperantzia 'e biri prus sa luxi
medas nd'happu biu ce custu armentu
ca pagu timori teniant pro sa gruxi.
- De onny' arratza, de onnya bentu
de onnya lingua, de onnya furrungoni:
hominis e feminas in trumentu,
ca pagu iant ascurtau sa relijoni.
- De mi nci andai in pressi 'e cussu logu
disiju mannu insa mi fiat benìu,
una bessìda cirkendi fia cun s'ogu
fintzas a candu u' jàssu jei ia biu.
- Intrau nci fia in una gallerìa
in pressi sempri prus coitendi,
u' pudesciòri 'e intoscu jai intendìa
manu, manu ki ananti fia andendi.
- Tottu stronada deu portà sa menti
in u' baulòdru mannu fia arribàu
prenu de medra fumiosa e callenti
e ia cumprendiu cussu fragu mau.
- Fikkida inguni dho-y ia biu sa genti
bella, grassa e tottu incrobattàda
e imoi deu si contu de cumenti
est in mesu de cussa strecosciàda:
- Lutzu e strecosciu jai a murrus tòccat
e-y cussus: "No ti movast - tzerriendi -
ki no sa marettàda si nc'imbùccat,
ki abarras sa medra santziendi"!
- Justitzia 'e Deus pro cresci su trumentu,
is carigònis mannus dhis hat donau,
de aici podint tott' in u' momentu
mellus intendi cussu fragu mau.
- E inguni nd'happu connotu tantis
medas fiant cun su scudu ingruxàu
deu bolu nai cussus politicantis
ki lassant su poburu assupau,
- E tzerria, tzerria in mes' 'e su budrellu
y arranca, arranca in mes''e cussus fragus
dho-y fiat sa cumpanjìa 'e su gravellu;
fracci e marteddu puru, ma prus pagus!
- In pressi fuiu mi fia de cussu logu
de fragu mau e onnya tribulìa
offendiu fia in su nasu e puru in s'ogu,
peus cosa mai ia biu in vida mia!
- Sa missa est finida, in paxi andai
deu imoi no si deppu nai prus nudda,
ca esistit Deus puru arregodài
e no pentzeis fetti a preni sa 'udda:
- E CANTU IN CUSTU MUNDU PARRIT BELLU
PAGU E NUDDA CONTAT IN SU CELU;
- CA IS COSAS DESSA TERRA PAGU BALINT,
E ARREGORDAISI' FEMINAS E HOMINIS
PRO NCI PESAI A CELU NO NCI BOLINT
NI' SCALAS, NI' SCALITTAS, NI' SCALONIS! (fine)
--------------------------------------------------------------------
IS POLITICANTIS...CROBU CUN CROBU > SONETTU
- Crobu cu crobu avatt''e su fragu
arribant a su spegu e meda siat o pagu
brincant e biccant de basciu e de susu
fintzas ki petza no nd'abarrat prusu.
- Ladronis e furuncus intrant a corratzu
de berbei y anjoni faint sbaratzu
su tallu si pratzint sena de certai
e pentzant a s'ateru de torrobai.
- Bestias y hominis de banda e de fura
furant e pappant in pranu, in artura.
castiant impari pro sighì a pappai.
- E is politicantis a ki hant arratzài:
de fura e pappàda funt asuriosus
e certant impari ke canis arrabbiosus! (fine)
-----------------------------------------------------------
BERANU...(primavera)
E nci bogat su frius
Zefireddu sulendi
in sa bia currendi
torraus a bì is pippius!
Torràda...
Est tottu unu spantu
de musica e coloris
de luxis e de cantu
de pillonis e de froris!
Torràda...
O homini potenti
ki cumandat sa terra
dona paxi assa genti
finiìdha imoi sa gherra!
Torràda... fine.
--------------------------------------------
Is Votatzinis...(le elezioni)
Si torrat a votai
cun listas e sinnus,
po mannus e piccinnus
su disigiu de cambiai!
Torràda...
Arribat su momentu
y accabat su trumentu,
hat bintu tzertamenti
su ki hat vatau sa genti!
Torràda...
Bessiu nc'est Puddu
andau sind'est Pilloni
speraus ki custu 'e imoi
siat mellusu de cuddu!
Torràda... (Trallaleru/a)
------------------------------------------